Kollsterinn & Felix Skafti

22.04.2012 20:51

Konan sem hann elskaði áður

Nýjasta þýdda bókin eftir eina af mínum uppáhalds er komin út og heitir ekkert lítið dramatísku nafni eða "Konan sem hann elskaði áður" Eins og sjá má á bókakápu og lesa úr titli þá er þetta eitthvað sem ég myndi klárlega kalla konubók og efast stórlega um að margir menn myndu þora að láta grípa sig með æpandi bleika bók, skreytta kökum og berandi þennan titill. EN nóg um það.

Þessi bók hennar Koomson minnar (segi ég eins og ég þekki hana) fjallar um konu sem kynnist manni ..og þessi maður á fortíð sem blandast inn í þeirra samband að fleiru en einu leyti.

Hér er innihaldslýsing frá útgefanda sem mér finnst alltaf gott að láta fylgja með.

Libby ætlaði ekki að falla fyrir Jack. Hann var langt frá Því að vera hennar týpa með sitt stóra egó og óbilandi sjálfsöryggi. Seinna fara að læðast að henni grunsemdir um að hann geti aldrei elskað nokkra konu eins og Eve, fyrstu ástina hans sem lést með voveiflegum hætti.

Þegar örlögin snúa lífi þeirra á hvolf einsetur Libby sér að komast að öllu sem hún getur um Jack og hina fullkomnu Eve. En með hverjum steini sem hún veltir við, hverju leyndarmáli sem hún afhjúpar, hefur hún ríkari ástæðu til að óttast um eigið líf .

Ég er hrikalega ánægð að Forlagið fór að þýða bækur eftir þessa konu, hún er fínn penni, ég renn alltaf í gegnum bækurnar hennar á góðu tempói og leiðist aldrei. Uppáhaldið mitt er nú samt ennþá fyrsta þýdda bókin sem hún gaf út en hinar í kjölfarið hafa líka verið mjög fínar.

Bókin sem um ræðir hér er fínasta lesning. Ég tel mig nú ekkert brjálæðislega forvitna manneskju en þessi ´bók hélt forvitninni í mér vakandi allan lesturinn og ekki bara að ég vildi alltaf vita meira og halda áfram með söguna heldur á vissum tímapunktu þá langaði mig helst að fletta á aftasta kaflann og sjá hvort ég gæti stytt mér leið, en þar sem ég svindla ekki þá sleppti ég því að sjálfsögðu.

Karakterar eru skemmtilegar og sumir sem ég sá ljóslifandi fyrir mér meðan aðrir voru meira svona hliðar-spors týpur.

Hlakka klárlega til að lesa meira eftir hana Koomson en ég veit ekki alveg hvar ég staðset þessa í röðinni af uppáhalds samt því hún var rosalega löng en samt er sagan svo einföld og hefði að mínu mati alveg í rauninni mátt vera aðeins styttri.

Kollsterinn..Koomson kreisí

Höf : Dorothoy Koomson

Útg : JPV

Skrifað af Kollsterinn

13.04.2012 18:18

Hungurleikarnir

Hungurleikarnir gerast á rústum staðar sem eitt hét Norður Ameríka en heitir nú í bókinni Panem. Þar í miðið að ég held er Kapítól og umkringd hana eru 12 umdæmi sem öll hafa sín einkenni. Á hverju ári þurfa börn frá aldrinum 12-18 að setja nafnið sitt í söfnunarskál sem er svo dregið út á Hungurleikunum. Hungurleikarnir ganga út á það að 2 börn frá hverju umdæmi (einn strákur og ein stelpa) eru dregin út árlega og send út í tilbúið svæði þar sem þau berjast fyrir lífinu sínu og eingöngu 1 barn má koma út lifandi. Þau þurfa semsagt að drepa hvert annað og halda þannig sínu eigin lífi.

Inn í þetta blandast svo ástarsaga og ýmis pólitík.

Aðalsöguhetjan er Katniss sem býður sig fram þegar systir hennar er dregin út.

Ég las þessa bók í einu rykk. Mér fannst hún kanski eins rosalega hrikalega spennandi og allir voru búnir að tala um en spennandi var hún alveg samt. Ég hugsaði ekkert rosalega mikið um boðskapinn í bókinni meðan ég las hana heldur las þetta meira eins og ævintýraheim sem ekki er til svo ég var nokkuð ónæm fyrir ljótleikanum sem liggur á bakvið þetta allt saman.

Svo talaði ég við vinkonu mína um bókina og hún opnaði eiginlega augu mín fyrir því hversu skrýtið það er að skrifa svona bók fyrir unglinga . Það er að segja ef það er raunin að þetta sé skrifað fyrir unglinga eða börn. Ofbeldið í bókinni er mjög mikið og mjög ljótt. Maður fær samkennd aðallega með söguhetjunum tveimur en pælir lítið í því að hin börnin öll sem meiðast og deyja í sögunni eru líka bara saklaus börn sem voru dregin upp úr potti.

Ég er mjög spennt að lesa næstu bók , sérstaklega þar sem kærastan mín er alveg föst ofaní framhaldinu og er að lesa það allt saman á ensku ..komin á bók 3.

En svona rasslína (bottomline) á þessu öllu saman er nú samt sú að mér fannst bókin góð, mér fannst hún vel skrifuð og halda mér vel. Ég er þó samt á þeirri skoðun að mér finnist hún eiga að vera fullorðinsbók sem eldri unglingar geti auðvita alveg lesið en ég myndi ekki mæla með henni fyrir mjög ung börn. Ég myndi miða við 15/16 ára og eldri held ég.

En það er sossum bara mín skoðun því allir gagnrýnendur eru á því að þetta sé alveg bókin til að fá börnin til að lesa....

Kollsterinn...á báðum áttum

Höf : Suzanne Collins

Útg : JPV

Skrifað af Kollsterinn

01.04.2012 09:49

Ljósa

Ég var búin að heyra ótrúlega margt fallegt um þessa bók sem hér er á ferðinni. Ég var líka alltaf á leiðinni að fara að lesa hana en svo er endalaust mikið nýtt að koma út og þá falla þessar eldri bækur í skuggann á þeim allra allra nýjustu.

Ég er búin að þurrka út örugglega átta sinnum það sem ég hef skrifað um innihald bókarinnar því það er erfitt að koma því í orð svo ég held að ég haldi mig við lýsinguna sem stendur aftan á bókinni því ég vil leyfa fólki að lesa hana eins og ég gerði..án þess að einhver segði mér nákvæmlega um hvað hún er.

Ljósa elst upp seint á nítjándu öd undir hvelfdum jökli með víðsýni yfir sjó og sanda. Hana dreymir um framtíð þar sem hamingjan ríkir og sólin skín. En veruleikinn ætlar henni annað ; þrátt fyrir góð efni og ástríka fjölskyldu vofir yfir henni ógn sem gefur engin grið.

Ljósa er held ég bara ein sú allra besta bók skrifuð af íslenskum höfundi sem ég hef lesið. Og það er engu ofaukið þegar ég segi að bókin láti mann gleyma stund og stað og maður fer beina leið á staðinn með persónum bókarinnar. Höfundur á miklu meira en hrós og rauða rós skilið fyrir þessa bók því hún er ólýsanlega góð.

Bókin er auðlesin og í leiðinni samt mjög djúp og áhrifamikil. Hún er mjög erfið á köflum og ég var oft með tárin í augunum en í leiðinni er hún samt svo falleg og skiljanleg.

Ég las bókina og hugsaði með mér að þetta hlyti barasta að vera sönn saga því sagan er það lifandi og höfundur hlýtur barasta að hafa einhverja innsýn í heim geðsjúkdóms auk þess sem allir í kringum Ljósu eru svo vel skapaðir og ekki síst hún sjálf.

Maður skilur hana svo vel og hennar hugsanir en maður skilur líka fólkið hennar svo vel því vitund um geðveiki var ekki nándar nærri sú sem hún er í dag.

Ég á eiginlega ekki til neitt lýsingarorð til að segja hvað mér fannst um þessa bók því hún snart mig alveg rosaleg djúpt. Þær bækur sem ég hef lesið á eftir þessari bók falla í skuggann af þessari og ekkert grín að vera sú bók sem maður les næst eftir Ljósu.

Án efa ein af allra bestu íslensku bókum (og þó víða væri leitað) sem ég hef lesið.

Ljósa er uppáhalds.

Ég skrifaði um 4 af mínum uppáhaldsbókum fyrir Nýtt líf um daginn sem nú er komið í búðir og hefði ég verið búin að lesa Ljósu áður en ég skrifaði það þá hefði ein þeirra bóka þurft að víkja fyrir þessari.

Kollsterinn....elskar Ljósu

Höf : Kristín Steinsdóttir

Útg : Vaka - Helgafell

Skrifað af Kollsterinn

28.03.2012 08:19

Táknmál blómanna

Hér er á ferðinni bók um munaðarlausa stúlku sem er búin að flakka milli heimila og munaðarleysishælis stóran part af sínu lífi. Sagan gerist þegar hún er að ná 18 ára aldri og er að fá að fara ein út í stóra heiminn. Við fylgjumst með ferð hennar og um leið rifjar hún upp líf sitt sem munaðarleysingi.

Verð alveg að viðurkenna að hvorki kápan á bókinni né titillinn var eitthvað sem dró mig að því að lesa bókina. Svo var ég búin að heyra nokkrar konur sem ég ber mikla virðingu fyrir tala um þessa bók og ákvað að gefa henni sjéns og lesa nokkrar blaðsíður.

Bókin er vel skrifuð og dregur mann hægt en örugglega inn í söguna á fyrstu köflunum. Sagan er falleg og lýsir eflaust mjög vel hugarheimi þess sem á enga foreldra og enga almennilega rót í lífinu. Aðalsögupersónan hún Victoria er skemmtilegur karakter og sagan lifnaði alveg við í huga mér.

Í heild sinni var þetta mjög fín lesning og get mælt með henni í sumarfríið til að mynda eða almennt í svona léttlestur að ég held.

Fer ekkert endilega í uppáhalds bunkann en vel þess virði að kíkja á hana samt.

Kollsterinn...nokkuð sátt.

Höf : Vanessa Diffenbaugh

Útg : JPV

Skrifað af Kollsterinn